Садыр Жапаров 17-19-май күндөрү Кытайга иш сапары менен барат. Бул тууралуу Жогорку Кеңештин "Ата Журт Кыргызстан" фракциясы менен "Мекенчил" депутаттык тобунун биргелешкен жыйынында министрлер кабинетинин башчысы Акылбек Жапаров билдирди.

Ал белгилегендей, бул сапар Кытай — Кыргызстан — Өзбекстан темир жолун куруу долбооруна байланыштуу.

"Мамлекет башчылары Кытай — Кыргызстан — Өзбекстан темир жолунун финансылык моделин консолидациялашат. Долбоордун техникалык-экономикалык негиздемеси бүткөрүлгөн. Азыр алардын секциясынын өлкөлөрү ыңгайлашып жатышат. Учурда бул долбоорго канча каражат сарпталары такталууда. Биз 3 миллиард доллардан 5 миллиард долларга чейин болот деп болжолдойбуз. Туннелдин 57 чакырымы биздин территория аркылуу өтөт. Мурда биз бул долбоор боюнча ЕЭК өлкөлөрү менен макулдаша алган эмеспиз, азыр бардык көйгөйлөр чечилип, долбоорду ишке ашырууга даярдык көрүү боюнча жигердүү иштер башталды", - деп түшүндүрдү Министрлер кабинетинин башчысы.