“Кумтөр Голд Компани” ЖАКтын мурдагы тышкы менеджери Тенгиз Бөлтүрүк 2023-жылдын 10-январына чейин УКМКнын камагында болот. Бул тууралуу Бишкек шаардык сотунан билдиришти.
Анын баш коргоо чарасын 10-январга чейин узартуу чечимин 14-ноябрда Октябрь райондук соту чыгарган. Бүгүн, 29-ноябрда Бишкек шаардык соту да Бөлтүрүктү 10-январга чейин камакта калтыруу чечимин чыгарды.
Эске салсак, Башкы прокуратура 13-сентябрда Тенгиз Бөлтүрүктүн кенди иштетүүдө каржылык мыйзам бузууларга, “Кумтөрдөгү” коррупцияга байланыштуу камалганын билдирген. Ал, Кыргызстандын Кылмыш-жаза кодексинин “Акционердик коомдор жөнүндө мыйзамдарда белгиленген чектөөлөрдү бузуу” беренеси боюнча Башкы прокуратуранын демилгеси менен кармалып, Бишкек ШИИБнин убактылуу кармоочу жайына камалган. Аны менен кошо жабдуу боюнча адис Айша-Гүл Фронтбек кызы Жаналиева, каржы башкармалыгынын директору Рыспек Токтогулов да кармалган.
Ошондой эле, 15-сентябрда шектүүлөр УКМКнын тергөө абагына которулган.