Кадамжай, Таш-Көмүр, Көк-Жаңгак жана Айдаркен шаарларынын суу тутумдарын оңдоо үчүн Европа реконструкциялоо жана өнүктүрүү банкынан 18 млн евро өлчөмүндө акча алынат. Тиешелүү мыйзам долбоору бүгүн үчүнчү окууда жактырылды. 

Каржы министринин орун басары Руслан Татиковдун айтымында, жалпы сумманын 10 млн евросу — насыя, 8 млн евросу – грант. Ал эми кайтаруу мөөнөтү  — 15 жыл. Насыяны төрт шаардын мэриясы өз эсебинен төлөшөт.

Депутат Гуля Кожокулова насыянын 2 млн 600 миң евросун долбоордун алкагында кеңешчилерге коротулуп жатканын белгиледи.

“Ал кандай кеңешчилер? Эмне иш аткарат? Менин бул суроолорум жоопсуз калып жатат.  Андан сырткары долбоорду ишке ашырууда сууга акы 80 пайызга көбөйтүлөт. Эмнеге муну ачык айтпайсыңар. Эл билиш керек”, - деди эл өкүлү.