Быйыл Суу чарба кызматынын чыгымдарына 4,4 млрд сом каралган. Бул тууралуу Каржы министрлиги билдирди.

Мында 1,2 миллиард сому бюджеттик каражаттар, 3,2 миллиард сому мамлекеттик инвестициялар.

Ирригациялык системаларды оңдоого 1 миллиард сом жумшалат. Эске салсак, 31-майда өткөн суу форумунун жүрүшүндө айыл чарба министринин орун басары Мурат Раматов өлкөнүн бардык ирригациялык системасын жаңылоо зарылдыгын билдирген. Анын айтымында, 5,9 миң чакырымды түзгөн чарбалар аралык каналдардын 40% жакыны тез арада жаңыланууну талап кылат.

"Жыл ичинде экскаваторлорду сатып алууга 199,4 млн сом бөлүү чечими кабыл алынган. Учурда мамлекеттик сатып алуу процедурасы жүрүп жатат. Ошондой эле Суу кызматына атайын техникаларды лизингге сатып алууга жакынкы жылдарга 1 млрд сомго жакын каралган, анын 350,0 млн сому 2023-жылы бөлүнөт", - деп белгиледи Финансы министрлиги.