Дүйнөлүк COVAX программасынын алкагында Кыргызстанга 420 миң доза вакцина жеткирилет деп күтүлүүдө. Бул тууралуу министрлер кабинетинин төрагасынын орун басары Жылдыз Бакашова Дүйнөлүк саламаттык сактоо уюмунун Кыргыз Республикасындагы өкүлчүлүгүнүн башчысы Назира Артыкова менен жолугушуу учурунда билдирди. 

Жылдыз Бакашованын айтымында, Кыргыз Республикасы клиникалык текшерүүдөн өткөн натыйжалуу вакциналарга гана эмес, ДССУнун бул вакциналарды туура пайдалануу боюнча сунуштарына, калкты эмдөө боюнча мобилдик топторду түзүүгө, электрондук жана мобилдик саламаттыкты сактоону техникалык колдоого, улуттук жана эл аралык сапат стандарттарын жайылтуу жана адистерди даярдоо үчүн лабораториялардын потенциалын жогорулатууга муктаж.

ДССУнун Кыргыз Республикасындагы өкүлчүлүгүнүн башчысы Назира Артыкова өз кезегинде Министрлер Кабинети менен мындан аркы эффективдүү кызматташууга даярдыгын белгиледи. 

Жолугушуунун жүрүшүндө тараптар өз ара аракеттенүү жана өнөктөштүк боюнча актуалдуу маселелердин топтомун, өлкөдөгү эпидемиологиялык кырдаал жана коронавирус инфекциясын чектөө чараларын талкуулашты.