Кыргызстандын бир дагы чарбасы органикалык өндүрүш боюнча эл аралык сертификатка ээ эмес. Бул тууралуу журналисттерге BIO-KG органикалык кыймыл федерациясынын директору Искендербек Айдаралиев билдирди.

Бүгүнкү күндө бүткүл республика боюнча органикалык кыймылдын принциптерине негизделген жергиликтүү жамааттар тарабынан туруктуу айыл чарбасынын үлгүсү болгон органикалык аймактар ​​түзүлүүдө. Республика боюнча алардын саны 9 болуп, Чүй, Талас, Нарын жана Ысык-Көл облустарынын 23 айылында түзүлгөн. 2021-жылдын аягына карата колунда жергиликтүү органикалык сапат сертификаты менен 1 миң 56 фермер бар.

“Биз азырынча жергиликтүү рынок үчүн гана сертификация системасын түзүп, дыйкандарыбыз ички рынокко мөмө-жемиштерди өстүрсө дагы, эл аралык талаптарга жооп берген сертификатыбыз жок”, - деди Айдаралиев.

Кыргызстандагы органикалык аймактардын көбү тоолуу аймактарда жайгашып, монокультураларды, негизинен картошканы, чөптөрдү жана дары чөптөрдү өстүрүшөт. Учурда 7 миң гектар жерге себүү иштери кызуу жүрүп жатат.