Бишкектеги массалык тамактан уулануу фактысына байланыштуу Мамлекеттик санитардык-эпидемиологиялык көзөмөлдөө борборунун адистери республиканын бардык аймагындагы коомдук тамактануучу жайларды текшеришет. Бул тууралуу Саламаттык сактоо министрлигинин расмий сайтында маалымдалды.

Ошондой эле, жугуштуу оорулардын жана уулануулардын алдын алуу максатында 2018-жылдан тартып "Ишкердик субъекттерин текшерүүгө убактылуу тыюу салуу (мораторий) киргизүү жөнүндө" Кыргыз Республикасынын Өкмөтүнүн токтомуна өзгөртүүлөр киргизилгени такталды.

Тактап айтканда, тамак-аш азыктарын өндүрүү жана жүгүртүү менен алектенген объекттерди текшерүүгө мораторий жокко чыгарылды.

Белгилей кетсек, тыюу салуу шаардагы кафелердин биринде тамак-ашка буйрутма берген 100дөн ашуун адамдын ууланышына байланыштуу алынган.