Социалдык фонддун 2022-жылга бюджетинин аткарылышын текшерүүнүн жыйынтыгында олуттуу финансылык мыйзам бузуулар аныкталды. Анын жалпы суммасы 536,8 миллион сомго жетет. Бул тууралуу Эсеп палатасынын басма сөз кызматы билдирди.

Анын ичинен 351,5 миллион сому калыбына келтирилиши керек болсо, 349,4 миллион сомдун орду толтурулган. Белгиленген мыйзам бузуулардын ичинен зарыл документтери жок төлөнгөн иш сапардын чыгымдары 14,7 миң сомду, бюджетке карыз болуп калган жана ушул күнгө чейин кайтарыла элек каражаттардын калдыктарынан түшкөн кирешелер 2,1 млн сомду түзгөн.

Ошондой эле, 8,1 млн сом өлчөмүндө туура эмес төлөмдөр, анын ичинде жумуш орундарын аттестациялоосуз эмгектин өзгөчө шарттары үчүн үстөк акылар 2,7 млн ​​сом жана өргүү акысын туура эмес төлөөлөр 5,4 млн сом өлчөмүндө аныкталган.

"Кыргызпочтасы" мамлекеттик ишканасы жана коммерциялык банктар аркылуу пенсияларды жана компенсацияларды жеткирүү жана которуу боюнча 177 млн ​​сом өлчөмүндөгү чыгымдар башка социалдык төлөмдөргө багытталган каражаттардын эсебинен мыйзамсыз жүргүзүлгөн.