2024-жылдын жазгы талаа айдап-себүү сезонун утурлай дыйкандар дизель майы менен камсыздоодо өзгөрүүлөргө дуушар болууда. Быйыл 42,5 миң тонна дизель майы талап кылынса, учурда анын литринин орточо базар баасы 71,5 сом. Бул тууралуу Айыл чарба министрлигинин басма сөз кызматы билдирди.

Бирок мамлекет дыйкандарга мамлекеттик колдоонун алкагында бир топ жеңилдиктерди сунуштап жатат. Мамлекеттик материалдык резервдер фонду аркылуу дыйкандарга дизель майын арзандатылган баада – литрин болгону 63,5 сомдон сатып алуу мүмкүнчүлүгү берилген.

“Бул сунуш өзгөчө актуалдуу болуп саналат, анткени 2023-жылдагы статистикага ылайык, 3 млн 466 миң литрдин жалпы көлөмүнөн дыйкандар жеңилдетилген баада 770 тоннага жакын дизель майын алышкан эмес. Бул мындай жоготууларга жол бербөө үчүн дыйкандардын көбүрөөк катышуусу зарыл”, - деп айтылат маалыматта. 

Кошумчалай кетсек, быйыл Матрезерв фонду дагы 7 млн литр дизель майын бөлүүнү пландоодо. Бул кадам айыл чарба секторунун үзгүлтүксүз иштешин камсыз кылуу жана күйүүчү май рыногунун өзгөргөн шартында фермерлерди колдоого багытталган.