Акыркы 2,5 жылда Кыргызстан боюнча 200гө жакын жаңы мектеп курулду. Бул тууралуу Министрлер кабинетинин башчысы Акылбек Жапаров Ош облусуна болгон иш сапарынын алкагында Кара-Суу районунун Зарбалык айылындагы мектептин ачылыш аземине катышып жатып билдирди.

Мектеп 375 орунга эсептелген, анын курулушу 2022-жылы башталып, республикалык бюджеттен 148,5 млн сом бөлүнгөн.

Акылбек Жапаров өз сөзүндө былтыр Кара-Суу районунда 22 мектеп, 8 бала бакчада курулуш иштери жүргүзүлүп, 14 жаңы социалдык объектилер ачылганын белгиледи. Октябрь, Ак-Терек, Керме-Тоо, Жапалак, Таш-Арык айылдарында мектептер ачылган. Дагы эки мектеп ачылууга даяр. Кара-Суу районунун курулуш тармагына жалпысынан 1 млрд сомго жакын каражат бөлүнгөн.