Жалал-Абад облусунда ишкерлер тапкан киреше боюнча салык 70% ачыкталбай жатат. Бул тууралуу өкмөттүн Жалал-Абаддагы өкүлү Абсаттар Сыргабаев 10-февралда өткөн облустук жыйында айтты.

2020-жылы салык кызматы республикалык бюджетке 62 млрд сом салык жыйнаган

Жыйында белгилүү болгондой, облуста өндүрүлбөй калган салык төлөмдөрүнүн суммасы 2021-жылдын 1-январына карата 381 миллион сомду түзүп, өткөн жылга салыштырганда 140 миллион сомго көбөйдү.

Район-шаарлардын ичинен өнө элек эң көп карыз Ноокенде 40 миллион сом болсо, Жалал-Абад шаарында 68 миллион сомго жеткен.

Облус башчысы ишкерлерди мыйзам жолуна түшүүгө чакырып, салыктарды жашырбоо керектигин айтты:

«Салык кызматы ошолор берген отчетуна эле макул болуп, ишкерлер менен бир болуп жатасыңар. Салыктын 30% эле көрсөтүлүп, 70% сол жакка кетип жатат».

Мамлекеттик салык кызматы быйылкы жылга карата планын көбөйтүп, мамлекеттик бюджетке 96 миллиард сом каражат чогултуу милдетин койгон.