Аз камсыз болгон үй-бүлөлөргө көрсөтүлгөн жардам тууралуу республикалык штаб дайыма маалымат берип турат. Бирок,VB.KG басылмасы берген маалыматка ылайык, мамлекеттен жардам баардык муктаждарга эле бериле бербейт.

Боронов: Калктын аярлуу катмарына жардам берүү иши ыкчам жана тегиз чечилиши кажет

Басылма берген маалыматка ылайык, «ЖЭК-52» кооперативдик турак-жайда жашаган Лобовь Щеглова аттуу үй комитетине, муктаж болгон пенсионер жана мүмкүнчүлүгү чектелген жарандардын тизмесин кыскартууну билдиришкен.

«Мен муктаж болгон жарандардын тизмесин түзүп барганда мага аны кыскартууну айтышты. Алардын айтымында, тизмедеги бардык жарандарга, мамалекет тараптан берилген жардам жете бербейт. Жыйынтыгында, пенсионер жана мүмкүнчүлүгү чектелген жарандарды кыскартып отуруп 22 адамдын гана аты калды», — деп жазат басылма үй комитетинин билдирүүсүнө таянуу менен.

Үй комитети кошумчалагандай, Кыргызстанда өзгөчө абал жарыялангандан бери «ЖЭК-52» турак-жайында жашаган бир дагы жаран мамлекеттен жана жеке адамдардан дагы эч кандай жардам алыша элек.