Акыркы бир жылда 136 миңден ашык жаран турак жайын камсыздандырды. Алар үчүн камсыздандыруу суммасы 77 млрд сомду түзөт. Бул тууралуу “Биринчи радионун” түз эфиринде Мамлекеттик камсыздандыруу уюмунун камсыздандырууну өнүктүрүү бөлүмүнүн башчысы Актан Турумбеков билдирди.

Маалыматка ылайык, учурда 1 млн 200 миң гана үй расмий каттоодон өткөн.

“Алардын 136 миңи гана камсыздандырылган, бул 11%ды гана түзөт. Бул абдан кичинекей көрсөткүч. Биздин пландарыбыз бул көрсөткүчтү 30%га жеткирүү. 2023-жылы 151 жаранга камсыздандыруу төлөндү. Бул сумма 27 млн сомду тузду. Уюм иш баштаган биринчи күндөн тартып ар кандай кырсыктардан жапа чеккен 1 миңге жакын жаранга камсыздандыруу төлөндү. Алардын айтымында, Мамлекеттик камсыздандыруу уюму 100 млн сом өлчөмүндө каражат төлөгөн”, - деди Турумбеков.

Турумбеков камсыздандыруу полисинин баасы өзгөрбөгөнүн эске салды. Айыл жеринде жашагандар үчүн жылына 600 сом, шаар тургундары үчүн 1200 сом. Кырсык болуп калса, жабырлануучулар айыл жеринде 500 миң сомго чейин, шаарларда 1 млн сомго чейин ала алышат.