Кыргызстандын мурдагы премьер-министри Жоомарт Оторбаев “Кумтөр” иши боюнча күнөөлүү деп табылды. Бул тууралуу Бишкектин Биринчи май райондук сотунун басма сөз кызматынан билдиришти.

Аталган райондун сотунун 2021-жылдын 30-декабрындагы өкүмү менен Оторбаев Кылмыш-жаза кодексинин 319-беренесинин 2-бөлүгүндө (коррупция) каралган кылмышты жасагандыгы үчүн күнөөлүү деп табылды.

“Оторбаевге карата 3 миң эсептик көрсөткүч өлчөмүндө, башкача айтканда, 300 миң сом өлчөмүндө айып салды”,- деп айтылат өкүмдө.

Кошумчалай кетсек, УКМК экс-премьер-министр Жоомарт Оторбаевди өткөн жылдын 16-сентябрында Кумтөр боюнча козголгон кылмыш ишинин алкагында кармаган. Тергөөдө аныкталгандай, Оторбаев премьер-министри болуп турган кезде, Курчап турган чөйрөнү коргоо жана токой чарбасы мамлекеттик агенттигинин Кумтөр кенинин башкы планынын алкагында айлана-чөйрөгө тийгизген таасирин баалоо үчүн, КРнын “Суу жөнүндө” Суу кодексинин жана КРнын мыйзамынын талаптарын бузуу менен, “Кумтөр Голд Компанинин” чет элдик компаниясынын кызыкчылыгы үчүн буйрук алып, Лысый жана Давыдов мөңгүлөрүн мындан ары жок кылууга макулдук берген.