Кыргызстан Түркмөнстандан электр энергиясын коммерциялык баада импорттойт. Бул тууралуу Улуттук энергохолдингдин башкармалыгынын төрагасы Талайбек Байгазиев маалымат жыйынында билдирди.

Бирок импорттолгон электр энергиясынын баасын ачыктаган жок. Ал бул коммерциялык сыр экенин айтты.

"Оперативдүү маалыматтар боюнча биз 305,8 млн киловатт-саат электр энергиясын алдык. Ал эми башкы план 501,9 млн", - деп билдирди энергетикалык холдингдин жетекчиси.

Анын айтымында, учурда Казакстан менен Өзбекстан дагы Кыргызстанга электр энергиясын берип жатат. Бирок жакынкы аралыкта Казакстанда электр жарыгы тартыш болуп жатканына байланыштуу берүү токтотулушу мүмкүн.

"Бүгүнкү күндө Казакстандын энергетика системасынан электр энергиясын алмаштыруунун алкагында 75,7 млн ​​киловатт-саат электр энергиясы алынган, планда 120 млн, Өзбекстандан 72,6 млн, план 100 млн. миллион киловатт-саат", - деди энергохолдингдин башкармасынын төрагасы.