Ушул жылдын биринчи кварталында Кыргызстанга ташылып келинген автоунаалардын импорту физикалык түрдө 4,4 эсеге көбөйдү. Тактап айтканда Кыргызстанга 30 871 автоунаа алынып келинген. Бул тууралуу Улуттук статистикалык комитет билдирди. 

Маалыматка ылайык, нарк жагынан алганда, жеткирүүлөр 6,6 эсеге өсүп, 323 млн. долларга жеткен.

Орто эсеп менен 1 жеңил унаанын импорттук баасы 7 миң доллардан 10 миң 500 долларга чейин өскөн.

Жүргүнчүлөрдү ташуучу унаалар төмөнкү өлкөлөрдөн алынып келинген: 

• АКШ – 36,2 млн. долларга 8286 автоунаа (бир унаанын орточо баасы 4363 доллар);
• Түштүк Корея — 64,3 млн. долларлык 7930 автоунаа (бир унаанын орточо баасы — 8105 доллар);
• Жапония — 33,5 млн. долларлык 3615 автоунаа (бир унаанын орточо баасы — 9267 доллар);
• Россия — 29,8 млн. долларлык 2807 автоунаа (бир унаанын орточо баасы — 10 607 доллар);
• Грузия — 2,3 млн. долларлык 2629 автоунаа (бир унаанын орточо баасы — 863 доллар);
• Кытай — 57,1 млн. долларга 2 412 автоунаа (бир унаанын орточо баасы — 23 653 доллар).

Жалпысынан автоунаалар 40 өлкөдөн алынып келинген.