УКМК "мыйзамдагы ууру" аталган Камчы Асанбектин (Көлбаев) өкүл атасы, жеке ишкер Азим Ройдун жубайына издөө жарыялады. Мекеменин тараткан маалыматына караганда, К.Асанбек жана криминалдык элемент Азим Рой тарабынан кылмыштуу кирешелерди легалдаштыруу/адалдоо фактысы аныкталды.

Тактап айтканда, К.Асанбек менен Азим Рой “L.А.” жана "R" ЖЧКсын негиздеп, Бишкек шаарынан жер тилке каттатып, ага кеңселери жана кампалары бар коммерциялык имарат курушкан.

"Ошол эле учурда К.Асанбек жана Азим Рой өздөрүнүн иш жүзүндөгү ээликтерин жашыруу максатында аталган ишканалардын акцияларын жакын туугандарынын атына, анын ичинде Азим Ройдун жубайы – Н.З.Х.га катташкан", - деп айтылат маалыматта.

Мындан тышкары, сатып алуу булактарынын мыйзамдуулугун берүү үчүн уюштуруу курамына чет өлкөлүк инвестор деген ат менен Азим Ройдун аффилирленген адамы, Литва Республикасынын жараны К.Г. киргизилген.

Кылмыш ишин иликтөөнүн жүрүшүндө башка уюштуруучулар аталган кыймылсыз мүлк Азим Рой менен К.Асанбекке таандык экендигин тастыкталган.

2024-жылдын 20-мартында кылмыштуу кирешелерди легалдаштыруу/адалдоо фактысы боюнча Азим Ройдун жубайы Н.З.Х.га (сыртынан) айып тагылып издөөгө алынды.

Учурда тергөө иштери жүрүп жатат.

Эске салсак, УКМК буга чейин ишкер Азим Ройго да издөө жарыялаган.