Президент Садыр Жапаров “КРнын айрым мыйзам актыларына “Жер казынасы жөнүндө”, “Биосфералык аймактар жөнүндө” мыйзамдарга өзгөртүүлөрдү киргизүү жөнүндө” мыйзамына кол койду. Бул тууралуу президенттин сайтына жарыяланды. 

Мыйзам Жогорку Кеңеш тарабынан 2024-жылдын 17-апрелинде кабыл алынган. 

Кабыл алынган мыйзамда жер казынасын пайдалануу укугуна аукциондун жеңүүчүсү болуп эң жогорку бааны сунуштаган катышуучу табылаары каралган. Ири жана орто алтын, күмүш кендери боюнча да жеңүүчү мамлекетке үлүшүн сунушташы керек. Бул үлүштүн өлчөмүн аныктоонун тартиби Министрлер кабинети тарабынан белгиленет.

Биосфералык аймактарда геологиялык чалгындоо, минералдык ресурстарды өздөштүрүү жана жер казынасын геологиялык изилдөө азыр Министрлер кабинетинин чечими боюнча гана мүмкүн.

Бул өзгөртүүлөр жер казынасын пайдалануунун эффективдүүлүгүн жогорулатууга жана биосфералык аймактардагы кендерди иштетүүгө кыйла рационалдуу мамиле жасоону камсыздайт деп күтүлүүдө.