Жарыяланган
2025-01-09, 13:41Жалал-Абад облусунун Ала-Бука районунда “Бай-Талаа” экспорттук логистикалык мал чарба борборунун курулушу аяктады. Бул тууралуу Айыл чарба министрлиги билдирди.
Борбордун курулушу 20-августта башталган. Бүгүнкү күнү 98% аяктап, пайдаланууга берилгени турат.
Тактап айтсак ал Ала-Бука айыл аймагындагы Баймак айылынын “Андагүл” участкасында жайгашкан.
“Кыргыз Эко Экспорт” ишканасынын буйрутмасы менен “Арх Курулуш” ишканасы куруп жаткан бул объект 3 миң баш малга ылайыкталган. Анын жалпы аянты 50 000 м² түзөт. Ал эми, комплекс жеке инвестициянын эсебинен 18 млн сомго каржыланган.
Объект толугу менен ишке берилгенден кийин, жергиликтүү тургундар үчүн 1 миң 200 жумуш орду түзүлөрү күтүлүүдө.
Учурда кошумча иштер - автоунаа токтотуучу жайларды уюштуруу жана кардарларга ыңгайлуу шарттарды түзүү иштери аткарылууда.
