Кыргызстандын тышкы жана өз ара соодасы январь-март айларында 4%га кыскарды

2026-жылдын январь–март айларында Кыргызстандын тышкы жана өз ара соода жүгүртүүсүнүн көлөмү 3.356 млрд долларды түздү. Бул өткөн жылдын ушул мезгилине салыштырмалуу 4%га азайды.

Ал эми экспорттун көлөмү 482.9 млн доллар болуп, 10.6%га төмөндөдү. Мындай кыскаруу негизинен КМШ өлкөлөрүнө товар ташуунун азайышы менен байланыштуу. КМШдан тышкаркы өлкөлөргө экспорт дагы 19%га кыскарган.

Импорттун көлөмү болсо 2.873 млрд долларды түзүп, өткөн жылга салыштырмалуу 2.3%га азайды. Ошол эле учурда КМШ өлкөлөрүнөн товар импорттоо 11.2%га өскөн.

Жалпы соода жүгүртүүсүнүн түзүмүндө экспорттун үлүшү 14.4%, ал эми импорттун үлүшү 85.6%ды түздү.