Санариптик өнүктүрүү министрлиги Кыргызстанга келген чет элдиктерди каттоодо жана Кыргызстандын жарандыгын алууда мамлекеттик алымдардын суммасын жогорулатууну сунуштоодо. Тиешелүү токтом долбоору коомдук талкууга коюлду.

Маалыматка ылайык, бул иш-аракет республикалык бюджетти толтуруу максатында жүргүзүлүүдө.

Мамлекеттик алымдардын өлчөмдөрүн төмөндөгүдөй белгилөө сунушталууда:

• туруктуу жашоого уруксат берүү үчүн - 10 миң сом (учурда 2,5 миң);
• жашап турууга уруксаттын мөөнөтүн узартуу үчүн, жоголгон же бузулган документтин ордуна жаңы документ берүү үчүн - 1000 сом (учурда 200 сом);
• каттоо же каттоону узартуу үчүн - 1000 сом (учурда 100 сом);
• Кыргызстандын жарандыгына кабыл алуу, калыбына келтирүү же андан чыгуу жөнүндө арыздардын тарифи - 1000 сом (азыр 100 сом);
• Кыргызстандын жарандыгына кабыл алуу жана андан чыгуу жөнүндө арыздардын тарифи (этникалык кыргыздарга, качкындарга жана ички жер которгондорго тиешеси жок) - 10 миң сом (азыр 2 000 сом);
• чек ара аймагына кирүүгө уруксат берүү - Кыргызстандын жарандары үчүн 100 сом (учурда 50 сом) жана чет өлкөлүктөр үчүн 500 сом (учурда 250 сом).

Белгилеп кетсек, 1998-жылдан бери мамлекеттик алымдардын өлчөмү өзгөргөн эмес. Бул убакыт аралыгында мамлекеттик кызматкерлердин маянасы, кеңсе буюмдарына, күйүүчү майга, коммуналдык кызматтарга, интернет тарифтерине жана имаратты ижарага алуу баасы бир топ жогорулады.

Санариптик өнүктүрүү министрлигинин маалыматы боюнча, өткөн жылы учурдагы тарифтерге ылайык мамлекеттик алымдарды төлөөдөн түшкөн каражаттын көлөмү 73 млн 466 миң 50 сомду түзгөн. Сунушталган токтом долбоору кабыл алынса, бул көрсөткүч 786 млн 745 миң 700 сомго чейин өсүшү мүмкүн.