Министрлер кабинетинин биринчи орун басары Арзыбек Кожошев Кыргызстандын калкын жана турак-жай фондусун каттоо боюнча республикалык комиссиянын кеңешмесин өткөрдү. Бул тууралуу министрлер кабинетинин басма сөз кызматы билдирди.

Кеңешменин жүрүшүндө белгиленгендей, Улуттук статистикалык комитети өлкөнүн бардык аймагында калкты жана турак жай фондусун каттоонун биринчи этабын өткөрдү.

«4-6-апрелге чейин контролдук кыдыруу өткөрүлүп, анын жүрүшүндө өлкөнүн 800дөн ашык тургуну 1216 ишеним телефону, ошондой эле массалык маалымат каражаттары жана социалдык тармактар аркылуу кайрылышкан. Жалпысынан 2000ден ашык арыз катталган», - деди Улуттук статистикалык комитетинин төрагасы Бактыбек Кудайбергенов.

Ал кошумчалагандай, ишеним телефонуна кайрылуунун негизги темасы эл каттоо маалында үйдө жок болгондугуна байланыштуу жарандардын эл каттоону кайра өткөрүү сунуштары болду. Ошондой эле жарандар эл каттоого өз убагында катыша албай калган башка себептер да айтылды. Алынган маалымат арыз бергендерди эсепке алуу үчүн аймактык статистика органдарына жөнөтүлдү.

Өз кезегинде Кожошев белгилегендей, калкты каттоонун негизги максаты - калктын саны жөнүндө реалдуу жана так маалыматтарды алуу.

«Биз республиканын ар бир жаранынын маалыматтарын эске алуубуз жана контролдук кыдырууну 23-апрелден 2-майга чейин узартышыбыз керек», - деди Кожошев.

Натыйжада, өлкөнүн алыскы аймактарында калкты жана турак жай фондун каттоо 23-апрелден 2-майга чейин өткөрүлөт. Ошол эле учурда биринчи этапта кандайдыр бир себептер менен эл каттоодон өтпөй калган адамдар үчүн контролдук каттоо өткөрүлөт.