Опубликовано
24.04.2023, 09:00Былтыр Кыргызстанда камсыздандыруу компаниялардын кирешеси 2,9 миллиард сомду түзүп, мурунку жылга салыштырмалуу 1,8 эсе көбөйдү. Бул тууралуу Улуттук статистикалык комитети билдирди.
Былтыр өлкөнүн каржы тармагында 15 камсыздандыруу компаниясы иштеген. Алардын кирешесинин негизги бөлүгү (жалпы сумманын 74,6%ы) камсыздандыруу төлөмдөрүнөн түшкөн.
Былтыркы жылдын аягында камсыздандыруу компаниялары 378 миллион сомдон ашык таза киреше алышкан, бул 2021-жылга салыштырмалуу 47,4%га көп.
Эске салсак, 2022-жылы камсыздандыруу компаниялары 315 миң камсыздандыруу келишимин түзүшкөн, бул 2021-жылга салыштырмалуу 18,4%га көп. Мында түзүлгөн келишимдердин жалпы санынын 87,5%ы жеке жактар менен түзүлгөн келишимдерге туура келген. Түзүлгөн келишимдердин жалпы санынын дээрлик 59% ыктыярдуу камсыздандырууга туура келген.
