Министрлер кабинетинин чечими менен Социалдык-экономикалык чакырыктарга ыкчам чара көрүү боюнча антикризистик комитет түзүлдү. Бул тууралуу министрлер кабинетинин басма сөз кызматынан билдиришти.

Аталган чечим президентинин 2021-жылдын 12-октябрындагы № 435 "2026-жылга чейин Кыргызстанды өнүктүрүүнүн улуттук программасын бекитүү жөнүндө" Жарлыгын ишке ашыруу максатында кабыл алынган.

Анын негизги милдети – өлкөнүн социалдык-экономикалык өнүгүүсүнө терс таасирин тийгизген дүйнөдө болуп жаткан окуяларга ыкчам чара көрүү үчүн антикризистик башкарууну түзүү.

Социалдык-экономикалык чакырыктарга ыкчам чара көрүү боюнча Антикризистик комитеттин жетекчиси болуп министрлер кабинетинин төрагасы - президенттин администрациясынын жетекчиси саналат.

Министрлер кабинетинин төрагасынын биринчи орун басары Антикризистик комитеттин төрагасынын орун басары болуп бекитилди.

Антикризистик комитеттин курамына ошондой эле Кыргызстандын тиешелүү мамлекеттик органдарынын бир катар жетекчилери кирди.