Эмгек, социалдык коргоо жана миграция министри Кудайберген Базарбаев Улуу Британиянын Кыргызстандагы элчиси Николас Боулер менен кыргызстандыктарды сезондук жумушка орноштуруу маселесин талкуулады. Бул тууралуу аталган министрликтин басма сөз кызматы билдирди.

Кудайберген Базарбаевдин айтымында, жарандарды чет өлкөлөрдө мыйзамдуу, коопсуз ишке орноштуруу боюнча ар кандай иш-чаралар жүргүзүлүүдө. Бул аларга кошумча билим жана көндүмдөрдү алууга мүмкүндүк берет.

“Учурда Кыргызстандын жарандарын Улуу Британияда убактылуу сезондук жумушка мыйзамдуу түрдө жумушка алуу Улуу Британиянын өкмөтү тарабынан ыйгарым укук берилген үч оператор менен түзүлгөн келишимдердин негизинде ишке ашырылууда. Келишимге ылайык, 2023-жылга карата Кыргызстандын жарандары үчүн 8 миң адамга квота бөлүнгөн”, - деди министр.

Сезондук айыл чарба жумушчуларынын программасы боюнча Улуу Британиянын фермаларында ийгиликтүү өткөн Кыргызстандын жарандарынын жалпы саны бүгүнкү күндө 5230 адамды түздү.