Бишкектеги №12 мектептин жаңы имаратын курууга коррупцияга каршы күрөштөн түшкөн каражаттар үчүн ачылган Бирдиктүү депозиттик эсептен 71 млн сом бөлүндү. Бул тууралуу Турак жай-жарандык курулуш департаментинин башчысынын орун басары Жумабай Каримжанов билдирди.

Анын айтымында, келерки аптада курулуш иштерин жүргүзүп жаткан компания имараттын чатыр жабууга киришет.

«Жаңы корпустун аянты 3 миң 200 чарчы метрди түзөт, ал 384 орунга эсептелген. Анда административдик бөлмөлөр, спорт зал, ашкана каралган», - деди ал.

Каримжанов белгилегендей, жаңы имаратты келе жаткан окуу жылында пайдаланууга берүү пландалууда.