Финансы полициясынын азыркы жүргүзүп жаткан ишинде ЕККУнун (Европа Коопсуздук жана Кызматташтык уюму) Бишкектеги программалык кеңсесинин башчысы, элчи Пьер фон Аркс оң натыйжаларды көргөндүгүн белгиледи. Бул тууралуу ведомствонун басма сөз кызматы кабарлады.

Финансы полициясы: Т. Сарпашев 500 гектардан ашык жерди мамлекетке кайтарды

Бишкекте Сыймык Жапыкеев менен ЕККУнун Бишкектеги программалык кеңсесинин башчысы, элчи Пьер фон Аркстын жолугушуусу болду.

«Пьер фон Аркс мырза Финансы полициясынын ишмердигине байкоо жүргүзүп жаткандыгын жана кызматтын ишинде оң натыйжаларды көргөндүгүн белгиледи. Ошондой эле, ал Финансы полициясы органдары өлкөгө чет өлкөлүк инвестициялардын келиши үчүн жагымдуу шартты камсыз кылууда маанилүү ролду ойной тургандыгына макул жана финансылык тергөө жана экономикалык кылмыштуулукка каршы күрөшүү жаатында дараметти көтөрүү маселелеринде колдоо көрсөтүү менен мындан аркы жемиштүү кызматташууга даяр экендигин тастыктады», - деп жазылат маалыматта.

Эске сала кетсек, Сыймык Жапыкеев Финансы полициясынын төрагасы болуп үстүбүздөгү жылдын 18-октябрында дайындалган.