Ушул жылдын биринчи жарымында кыргызстандыктар чет өлкөгө жигердүү саякаттай баштады. Мындан улам алардын чыгымдары да өскөн деп билдирди Улуттук статистика комитети.

Маалыматка ылайык, 2023-жылдын алты айында кыргызстандыктардын саякат чыгашалары 261,9 млн долларды түзгөн, бул сумма өткөн жылдын ушул мезгилине салыштырмалуу 3,8 эсеге көп.

Ошондой эле, өлкөдө саякаттарды камсыздандыруу да кескин өскөн. Быйыл жарым жылда 27 миңге жакын камсыздандыруу келишими атайын туристтик максаттар үчүн түзүлгөн. (2022-жылга карата өсүү 1,6 эсе). Бул камсыздандыруу келишимдеринин жалпы санынын 14,8%ын түзөт.

“Туризм тармагындагы камсыздандыруунун жалпы суммасы 70,4 млрд сомго жетти. 2022-жылдын январь-июнь айларында бул сумма 52,2 млрд сомду түздү”, - деп айтылат статистикалык маалыматта.

Туризм тармагындагы камсыздандыруу төгүмдөрү да бир топ өстү. Быйылкы жылдын башынан бери 65,5 млн сом түшкөн. Бул сумма 2022-жылдын биринчи жарымына салыштырмалуу 22,3 млн сомго көп. Учурда туризм камсыздандыруунун жалпы суммасынын 10%дан ашыгын жана алынган камсыздандыруу төгүмдөрүнүн 4,4%ын түзөт.