2024-жылы пенсияны жогорулатууга 960 млн сом каралган. Бул тууралуу Жогорку Кеңештин жыйынында Социалдык фонддун төрагасы Бактияр Алиев билдирди.

Анын айтымында, 2022-жылы пенсия 33 пайызга, 2023-жылы 38 пайызга көтөрүлгөн. Пенсиялардын камсыздандыруу бөлүгүн 7 пайызга жогорулатуу пландалууда.

“2022-жылы пенсияны жогорулатуу үчүн 20 млрд сом талап кылынган. Быйыл 1-октябрдан тарта 3 млрд 905 сом керек болду. 2024-жылга 16 млрд сом керек. Эки эле жылдын ичинде бизге дагы 40 млрд сом керек”, - дейт Бактияр Алиев.

Ал кошумчалагандай, акыркы 10 жылдан бери пенсия жыл сайын 2-3 пайызга көтөрүлүп келет.

Белгилеп кетсек, 1-октябрдан тарта пенсиянын камсыздандыруу бөлүгүн индексациялоо коэффициенти 30 миң сомго чейинки пенсиялар үчүн 1,38 өлчөмүндө белгиленген. Тактап айтканда, 30 миң сомго чейинки пенсиянын камсыздандыруу бөлүгү 500 сомдон кем эмес жогорулады. Бул үчүн 3,9 млрд сом каралган. Ал эми пенсиянын орточо өлчөмү жогорулагандан кийин 9 миң 354 сомду түзүп, орточо эсеп менен 1 миң 692 сомго өскөн. Бул инфляциянын деңгээлинен эки эсе көп.