«Коомдук транспорттогу электрондук билеттештирүү» долбоорунун алкагында 10 миң пенсионер «Тулпар» льготтук карталарын алды. Бул тууралуу Бишкек шаарынын мэриясынан кабарлашты.
Борбор калаада пенсионерлер үчүн «Тулпар» льготтук карталарын берүү маселеси боюнча жумушчу жыйын болуп өттү.
Карталарды берүү процессин ылдамдатуу маселесин талкуулоого вице-мэр Татьяна Кузнецова, КР Социалдык фондунун кызматкерлери, шаардык профилдик кызматтарынын өкүлдөрү, мэриянын структуралык бөлүмдөрүнүн кызматкерлери жана автобустар менен троллейбустарда электрондук билеттештирүүнү киргизип жаткан швейцариялык BPC ишканасынын өкүлдөрү катышты.
ВРС ишканасынын өкүлү Самат Базарбаев жакынкы арада пенсионерлерге льготтук карталарды берген дагы сегиз пункт ачыла тургандыгын белгиледи.
Вице-мэр Татьяна Кузнецова шаар боюнча борборлордун санын көбөйтүп, операторлордун ишин жөнгө салууну тапшырды.
Эске сала кетсек, бул жумда пенсионерлер үчүн льготтук картаны алуу процесси жеңилдетилген, эми алардын паспорту жана пенсиондук күбөлүгү менен карта берүүчү борборго келүүсү гана жетиштүү. Алар атайын мөөр бастыруу үчүн Социалдык фондго баруусу зарыл эместиги айтылууда.
Ошондой эле белгилүү болгондой, 1-марттан тарта кызыл карталарын али ала элек пенсионерлер пенсиондук күбөлүгүн көрсөтүү менен коомдук транспортто акысыз жүрө алат.
Материалды башка сайтка көчүрүү, “редакциянын уруксаты жана маалымат “булагынын” гипершилтемесине таянуу менен жасалууга тийиш
