Республикада дан эгиндерин чаап-жыйноо аяктады. 23-ноябрга карата 577 миң гектар аянттан дан эгиндери жыйналды. Чабылган аянттан 1 миллион 400 миң тонна эгин бастырылды, же 29% аз, деп жазды Улуттук статистикалык комитет

"Быйыл жайкы температуранын нормадан жогору болушу жана вегетация мезгилинде сугат суунун жетишсиздиги дан эгиндеринин түшүмдүүлүгүнүн төмөндөшүнө алып келди. Алсак, өткөн жылдын ушул мезгилине салыштырмалуу буудайдын дүң жыйымы 42%га, арпаныкы 46%га азайган", — деп белгилейт Улуттук статистикалык комитет.

Мындан тышкары, май өсүмдүктөрүнүн дүң жыйымы – 25,4%, кант кызылчасы – 19%, дарбыз – 14%, мөмө-жемиш өсүмдүктөрү – 3,9%, дан үчүн жүгөрү – 3,3%, картошка – 2,9% жана жашылчалар — 1,3 процентке аз болду.