Жылдын январь-июнь айларында экономиканын каржы секторундагы уюмдардын жалпы кирешеси 61 миллиард сомду (+32%) түздү. Мындай маалыматты Улуттук статистикалык комитет билдирди.

Ошол эле учурда финансы секторундагы уюмдардын жалпы чыгашалары 37%га өсүп, 38 млрд сомго жакынды түздү. Ишканалардын 64,5%ы киреше алса, 15,6%ы чыгашага учураган.

Балансталган финансылык натыйжа 23,1 млрд сом өлчөмүндө пайда түзүлдү, бул 2022-жылдын январь-июнь айларына салыштырмалуу 4,7 млрд сомго көп. Жалпысынан алганда, пайданын өсүшү коммерциялык банктар жана микрокредиттик уюмдар тарабынан камсыз болгон.

Ушул жылдын 1-июлуна карата банктардын жана банктык эмес финансы-кредиттик уюмдардын ачык кредит портфелинин жалпы көлөмү 266 миллиард сомдон ашыкты түздү. Кредиттердин жалпы көлөмүнүн дээрлик 86% банк секторуна, 14% банктык эмес финансы-кредиттик уюмдар секторуна туура келген.

Кредит берүүнүн негизги багыттары соода (жалпы көлөмдүн 25,7%), керектөө муктаждыктары (21,7%), айыл чарбасы (18,8%), ипотека (10,4%), курулуш (5,6%) жана өнөр жай (5,2%) болгон.