Жарыяланган
2024-26-12, 09:42Бүгүн Кыргызстанда биринчи маркетплейс Lemon Shopping’дин ачылышы өттү. Жаңы долбоор электрондук коммерцияны өнүктүрүүгө салым кошмокчу. Буга чейин өлкөдөгү электрондук коммерциянын көлөмү 359 миллион долларга жеткен.
Ошондой эле, Wildberries жана Ozon эл аралык платформаларында 20 миңден ашуун кыргызстандыктар өз товарларын сатышат жана бул көрсөткүч өсүүдө. Интернет-соода бүткүл өлкө боюнча жарандардын жашоосунун ажырагыс бөлүгүнө айланууда.
Limon Shopping – бул базардын, стримдик платформанын жана социалдык тармактын функцияларын бириктирген уникалдуу аянтча. Анда колдонуучулар оюн-зоок контентин көрүп эле тим болбостон, товарды түз өндүрүүчүлөрдөн сатып ала алышат. Долбоор Казакстан, Орусия жана Кытайдан келген өнөктөштөрдүн колдоосу менен ишке ашырылды. Кытай өндүрүүчүлөрү артыкчылыкка ээ болуп, алардын продукциялары биринчи кезекте платформага коюлду. Жергиликтүү ишкерлер бул платформанын артыкчылыктарын жана кемчиликтерин изилдей элек.
Иш-чарада Министрлер кабинетинин төрагасы Адылбек Касымалиев да сөз сүйлөп, долбоордун Кыргызстандын экономикасы үчүн маанисин баса белгиледи.
“Бул аянтча биздин ишкерлерге бизнесин жаңы деңгээлге көтөрүүгө, сатууну көбөйтүүгө жана ички жана тышкы рынокто кардарлар базасын кеңейтүүгө шарттарды түзөт. Технетрондук революциянын доорунда мындай долбоорлор соода үчүн жаңы жолду ачкан маяктарга айланат”, - деди Министрлер кабинетинин башчысы.
Ошондой эле, ал технологияны жана инновацияны өнүктүрүүгө багытталган демилгелерди мамлекет мындан ары да ар тараптуу колдоорун белгиледи. Касымалиевдин айтымында, Lemon Shopping Кыргызстандын глобалдык санариптик экономикадагы позициясын бекемдөө, бизнес жана керектөөчүлөр үчүн жаңы мүмкүнчүлүктөрдү түзүү үчүн маанилүү.
Стримдердин форматын жана колдонуучулардын өз ара аракеттенүүсүн эске алуу менен мындай маркетплейстин пайда болушун Кыргызстанда тыюу салынган TikTok платформасына альтернатива катары кароого болот. Ошол эле учурда, жергиликтүү чакан жана орто бизнестин катышуусу Lemon Shopping компаниясынын мындан аркы ийгилиги үчүн негизги фактор болот.
