Жарыяланган
2025-28-11, 17:05Бишкектин мэриясы Чыңгыз Айтматов проспектисиндеги жер тилкелер боюнча сотко берген доо арыздарын артка алууда. Мындай тапшырманы калаа башчысы Айбек Жунушалиев бергенин мэрия билдирди.
Маалым болгондой, мэриянын Жерди пайдаланууну көзөмөлдөө башкармалыгы сотко 29 доо арыз берген. Эми анын баары артка алынат. Бул чечим Чыңгыз Айтматов проспектисинин боюндагы үйлөрдүн ээлери менен жер тилкелери боюнча маселени сотсуз чечүү үчүн кабыл алынган.
Алгач жарандарга алына турган жеринин ордуна ошого ылайык жер сунушталат.. Жер алмашууну каалабагандарга кенемте төлөнөт. Кенемте жердин базар баасы боюнча эмес, тиешелүү мамлекет белгилеген кадастрдык баа боюнча берилет.
Эскерте кетсек, быйыл жазында Чыңгыз Айтматов проспектисин кеңейтүү иштери башталган. Анын алкагында мэрия кызыл сызыктан чыгып кеткен деп ондогон жарандын үйлөрүнүн тосмосун бузган. Үй ээлери алардын көбүндө кызыл китептери бар экенин айтып чыгышкан. Алардын айрымдары мэрияны сотко берген.
Кийин Жерди пайдаланууну көзөмөлдөө башкармалыгы аталган тургундардын жеринин документтерин жокко чыгаруу үчүн сотко кайрылган.
