Жарыяланган
2026-29-05, 12:49Кыргызстандын Экономика министрлиги Улуу Британия тарабынан кыргызстандык айрым мамлекеттик компанияларга киргизилген санкциялардын таасирин талдап, баалоо иштерин жүргүзүүдө. Бул тууралуу экономика министри Бакыт Сыдыков “Акчабардын” кабарчысына билдирди.
Анын айтымында, азырынча бийлик бул чектөө чараларынын өлкөнүн экономикасына жана бизнесине тийгизген таасири боюнча акыркы баа берүүгө даяр эмес.
“Учурда мүмкүн болгон кесепеттерди аныктоо үчүн ички консультациялар жүрүп жатат. Батыш өнөктөштөрү менен иштеген компанияларга белгилүү бир чектөөлөр болушу мүмкүн. Бирок эгер ишкана башынан эле Европа тарап менен байланышта болбосо, анда олуттуу таасир тууралуу сөз кылуу кыйын”, — деди министр.
Сыдыков азыркы учурда санкциялардан келип чыга турган тобокелдиктерди жана экономикалык таасирин баалоо иштери улантылып жатканын белгиледи.
“Жакын арада кесепеттерди тагыраак түшүнүүгө мүмкүн болот. Баалоо конкреттүү маалыматтар, сандар жана негизделген жыйынтыктар менен бекемделет. Азыр консультациялар уланууда”, — деп кошумчалады ал.
Эске салсак, 26-майда Улуу Британия Россия экономикасын колдоого жана эл аралык чектөөлөрдү айланып өтүүгө жардам берген структураларга каршы санкцияларды кеңейткен. Бул тизмеге Кыргызстандагы үч уюм да кирген: "Евразиялык Сактык Банкы" ААКсы, "Мамлекеттик брокердик компания" ААКсы жана "Виртуалдык активдер эмитенти" ААКсы.
