Жарыяланган
2026-05-10, 13:51Кыргызстанда санкциялык тобокелдиктерге байланыштуу 40ка жакын компания текшерилди. Алардын ичинен 16 компанияны жоюу маселеси сотко өткөрүлдү.
Бул тууралуу 2-октябрда президенттин өзгөчө тапшырмалар боюнча атайын өкүлү Бакыт Сыдыковдун төрагалыгы алдында өткөн жумушчу кеңешмеде айтылды.
Калган компанияларды текшерүү азырынча уланууда. Текшерүү аяктагандан кийин алар боюнча кандай чара көрүлөрү мыйзамга ылайык чечилет.
Ошондой эле Кыргызстанда санкциялык «кара тизмени» түзүү механизми даярдалып жатат. Ага санкцияга байланыштуу тобокелдиги жогору адамдар жана компаниялар киргизилет. Тизмени киргизүү боюнча чечим жакынкы күндөрү кабыл алынары күтүлүүдө.
Бул механизм аркылуу аталган компаниялардын жана алар менен иштеген башка тараптардын тышкы экономикалык операциялары көзөмөлдөнөт. Максат — санкциялык тобокелдиктерди операция жасала электе аныктоо.
Мындан тышкары, банктардагы текшерүү талаптарын күчөтүү маселеси да талкууланды. 2-октябрга карата «АБанк» 100гө жакын компания менен иштешүүнү токтотуп, алардын эсептерин жапкан.
Кеңешмеге мамлекеттик органдардын, Улуттук банктын жана коммерциялык банктардын өкүлдөрү катышты.
Бул чаралар Кыргызстандагы банктарды жана компанияларды чет өлкөлөрдүн санкцияларына туш болуу коркунучунан коргоо жана өлкөнүн каржы системасын мындай операцияларда колдонууга жол бербөө максатын көздөйт.
