Кыргызстан ЕАЭБ өлкөлөрүнүн ичинде бюджеттик кирешелердин өсүшү боюнча алдыңкы орунда

Кыргызстан Евразия экономикалык биримдигине (ЕАЭБ) мүчө мамлекеттердин ичинен бюджеттик кирешелердин өсүшү боюнча эң жогорку көрсөткүчкө жетишти. Бул тууралуу Евразия экономикалык комиссиясы маалымдады.

Быйыл, январь-июнь айларында республиканын бирдиктүү бюджетинин кирешеси өткөн жылдын ушул мезгилине салыштырмалуу 18.6%га көбөйүп, 351 миллиард сомго жетти. Былтыр бул сумма 296 миллиард сомду түзгөн.

Салыштырсак, Арменияда өсүш 15.5%, Казакстанда — 17.5% болсо, Россияда бюджеттик кирешелер болгону 3.1%га көбөйгөн.

Кыргызстандын бул жааттагы алдыңкы көрсөткүчтөрү негизинен салык жана бажы төлөмдөрүнүн активдүү чогултулушу, ишкердиктин жанданышы, ошондой эле өнөр жай менен соода тармактарындагы өзгөрүүлөргө байланыштуу.