Жарыяланган
2026-06-04, 16:54Кыргызстанда студенттерге дипломдук иштин ордуна өз стартапын же бизнес-долбоорун ишке ашырууга уруксат берилиши мүмкүн.
Билим берүү министрлиги жыйынтыктоочу аттестациянын форматын өзгөртүүнү караган мыйзам долбоорун коомдук талкууга чыгарды. Ага ылайык, экзамендер жана диплом коргоонун катарында жаңы вариант киргизилет — 4 айлык практика же стажировка жана анын жыйынтык отчету. Бул бизнес-план, стартап же иш жүзүндө ишке ашырылышы мүмкүн болгон долбоор болушу ыктымал. Тандалган форматты окуу жай өзү чечет.
Бул демилге билим берүүнү реалдуу рынокко жакындатуу жана жаштар арасында ишкерликти өнүктүрүү максатын көздөйт.
Адистердин айтымында, санариптешүү жана жасалма интеллекттин өнүгүшү менен эмгек рыногу тез өзгөрүп жатат. Мындан улам иш берүүчүлөр практикалык көндүмдөргө көбүрөөк басым жасай башташкан, ал эми билим берүү системасы рыноктун талаптарына толук жооп бербей жатканы айтылууда.
