Жарыяланган
2025-30-09, 16:42Россия-Кыргыз өнүктүрүү фонду Ысык-Көл облусунун Түп районунда жайгашкан «Каркыра» көп мезгилдүү туристтик комплексинин экинчи этаптагы курулушун каржылоо боюнча келишимге кол койду. Фонд тарабынан бул этапка 800 миң АКШ доллары бөлүнөт. Бул каражат бассейн курууга, коттедждерди эмерек менен жабдуу жана аймакты көрктөндүрүүгө жумшалат.
Долбоордун биринчи этабы буга чейин ишке ашырылып, каржылоосу жеке каражаттардан жүргүзүлгөн. Ал учурда бир катар туристтик инфраструктуралык объектилер пайдаланууга берилген. Жаңы каржылоонун эсебинен комплекс кеңейтилип, кызмат көрсөтүү деңгээли жогорулап, туристтердин саны артат деп күтүлүүдө.
РКӨФ маалыматына ылайык, «Каркыра» комплекси Ысык-Көл облусунда түзүлүп жаткан ири тоо-лыжа кластеринин бир бөлүгү болуп калат. Долбоордун экинчи этабы ишке ашкан соң туристтик агым көбөйүп, жаңы жумушчу орундар түзүлүп, региондун инвестициялык жагымдуулугу жогорулайт деп болжолдонууда.
