Жарыяланган
2025-19-08, 13:29Суу ресурстары кызматынын жетекчилиги Жалал-Абад облусунун райондорун кыдырып, суу чарба объектилеринин ишмердүүлүгү менен таанышты. Бул тууралуу Айыл чарба министрлиги билдирди.
Иш сапар алкагында биринчи болуп «Достук» насостук станциясы текшерилди. Бул станцияда орнотулган 6 агрегат жана 6 электр кыймылдаткыч аркылуу секундасына 1650 литр суу берүү мүмкүнчүлүгү бар. Натыйжада 1000 гектар айдоо аянты сугат суу менен камсыздалууда.
Андан соң, делегация Аксы районундагы 1979-жылы курулган «Желтыйбес» I көтөрүм насостук станциясына барды. Бул объект 858 гектар аянтты суу менен камсыздайт. Станцияда үч насос орнотулуп, экөө иштеп жатат, бирөө иштен чыккан.
Сапардын жүрүшүндө Сузак районунда 17 млн м³ көлөмдөгү сезондук суу сактагыч (БСР) куруу маселеси талкууланды. Долбоор ишке ашса, Көк-Арт өрөөнүндөгү 19 284 гектар айдоо аянты туруктуу суу менен камсыз болот.
Жетекчилик Токтогул районундагы Куйбышев каналын да көрүп чыкты. Узундугу 19,3 км болгон каналдын техникалык абалы начарлап кеткендиктен, аны оңдоо зарыл. Реконструкциядан кийин түшүмдүүлүккө оң таасир этет деп күтүлүүдө.
Базар-Коргон районундагы Сол-Жээк каналы аркылуу 9000 гектар жер сугарылат. Бирок каналдын каптамасы жана жантаймалары бузулгандыктан, өткөрүмдүүлүгү төмөндөп кеткен. Жай айларында Кара-Үңкүр дарыясында суунун азайышы да сугатка тоскоол болууда. Муну жоюу үчүн быйыл каналда оңдоо иштерин жүргүзүү пландалууда.
