Экономика жана коммерция министри Данияр Амангелдиев жана Финансы министри Алмаз Бакетаев 17-18-февралда Баткен облусуна болгон жумушчу сапарынын алкагында президенттин Баткен облусундагы ыйгарым укуктуу өкүлү Абдикарим Алимбаев менен жумушчу жолугушуусу болуп, Баткенди өнүктүрүү маселелери талкууланды.

Жолугушууда Амангелдиев Баткен облусун өнүктүрүүнүн негизги стратегиялык багыттарын белгиледи. Тактап айтканда, соода-логистикалык потенциалды өнүктүрүү, жагымдуу инвестициялык климат, туристтик жагымдуулук, айыл чарба, транспорт инфраструктурасын, ирригациялык тармактарды куруу жана реконструкциялоо, адамдардын жашоосу үчүн эң ыңгайлуу жана коопсуз мейкиндикти калыптандыруу маселелерин белгиледи.

Ал белгилегендей, өзгөчө статуска ээ болгон Баткен, Лейлек жана Кадамжай райондорунун чек арага жакын айылдары үчүн министрлер кабинети тарабынан бекитилген тизмеге ылайык, бардык ишкердик субъекттери үчүн жарактуу болгон атайын салыктык жеңилдик режими каралган.

“Баткен облусунун өзгөчө макамы бар чек ара аймактарынын тизмесин кеңейтүү сунушу айтылды”,-дейт Экономика жана коммерция министри.

Мындан тышкары, Баткен облусун 2021-2035-жылдарга өнүктүрүү программасын ишке ашыруунун негизги күтүлгөн жыйынтыктары жана аны ишке ашыруу боюнча Жол картасы сунушталды.

Анын алкагында 30 ири инвестициялык долбоорду ишке ашыруу каралган. Инвестициялык долбоорлор өнөр жай, энергетика, агроөнөр жай комплекси, ГЭСтерди, ТЛК, мейманканаларды куруу, Исфана шаарындагы аэропортту модернизациялоо багытында ишке ашырылат.

Учурда инвестициялык долбоорлорду инвесторлордун сунушуна даярдоо жана кийин ишке ашыруу боюнча иштер жүрүп жатат.

Ошондой эле, Баткен облусунун бардык аймагындагы салык төлөөчүлөр үчүн өнөр жай ишинин жеңилдетилген түрлөрү боюнча салыктык жеңилдиктер каралган, алар төмөнкүлөрдү камтыйт:

• инновациялык технологияларга негизделген өнөр жай өндүрүшүнүн бардык түрлөрү;
• жеңил жана тамак-аш өнөр жайы;
• энергетика;
• айыл чарба продукциясын кайра иштетүү;
• жыйноо өндүрүшү;
• экспортко багытталган ар кандай өндүрүш.
• Иштин бул түрлөрү үчүн салыктык жеңилдиктер каралган:
• кызматкерлер үчүн киреше салыгынын ставкасы 5%;
• киреше салыгынан, сатуудан салыктан бошотуу;
• жергиликтүү кеңештердин чечими боюнча 2- жана 3-топтогу мүлк салыгын төлөөдөн, жер салыгын төлөөдөн бошотуу.