Финансы полициясынын төрагасы Сыймык Жапыкеев Кыргызстандын бизнес-акыйкатчысы Робин Орд-Смит менен жолугушту. Бул тууралуу ведомствонун басма сөз кызматы билдирет.

Европа Коопсуздук жана Кызматташтык уюму Сыймык Жапыкеевдин ишин кубаттады

Маалыматка ылайык, жолугушууда Жапыкеев Финансы полициясынын артыкчылыктуу багыты мамлекеттин экономикалык коопсуздугун түздөн-түз коргоо, ак ниет ишкерлерди мыйзамсыз кийлигишүүдөн сактоо, бизнести жүргүзүү жана өлкөгө инвестициялардын келүү агымы үчүн эң жакшы шарттарды түзүү экендигин белгиледи.

«Ак ниет ишкерлер мамлекеттик органдардын бизнестин мыйзамдуу ишине мыйзамсыз кийлигишүүсү маселелеринде Финансы полициясынын негизги шериктештери болуп саналат. Алар булганыч атаандаштыкты, салык төлөөдөн качкандарды, мамлекеттик кызматчылардын таза эместигин жана албетте, ири коррупциялык схемаларды көрсөткөн маалымат берүүчүлөрдүн ролун аткарышат», — деп белгиледи Жапыкеев. 

Өз кезегинде бизнес-акыйкатчы Робин Орд-Смит мырза бул жолугушууну уюштургандыгы үчүн Финполдун жетекчилигине ыраазычылыгын билдирип, Финансы полициясы ишкердик субъекттердин жакын өнөктөшү, текшерүүчүлөрдүн ээн баштыгына каршы коргоочу болушу керектигин белгиледи.