Жарыяланган
2026-15-05, 12:00Евразия экономикалык биримдигине (ЕАЭБ) мүчө өлкөлөрдүн арасында 2026-жылдын башына карата катталган жумушсуздуктун эң жогорку деңгээли Арменияда катталды — ал жумушчу күчүнүн 2.1%ын түздү. Бул тууралуу Евразия экономикалык комиссиясынын маалыматында көрсөтүлгөн.
Бирок бул көрсөткүч убактылуу , себеби Казакстандын 2026-жылга карата маалыматтары азырынча жарыялана элек. 2025-жылдагы акыркы маалыматтарга ылайык, Казакстанда катталган жумушсуздуктун деңгээли 2.9%дан 3.6%га чейин жетип, Армениядагы көрсөткүчтөн жогору болгон.
Маалыматка ылайык, Кыргызстан ЕАЭБ өлкөлөрүнүн арасында экинчи орунда турат. Өлкөдө катталган жумушсуздуктун деңгээли 1.3%ды түздү.
Ошол эле учурда Кыргызстанда бул көрсөткүч акыркы жылдары туруктуу түрдө төмөндөп жатат. Салыштырып караганда, 2025-жылдын башында жумушсуздуктун деңгээли 1.7% болсо, 2021-жылы 3%га жакын болгон.
ЕАЭБ өлкөлөрүнүн ичинен эң төмөнкү көрсөткүч Беларусьта катталган — 0.1%. Россияда болсо бул көрсөткүч 0.4%ды түзөт.
Бул статистика иш менен камсыз кылуу кызматтарында расмий каттоодо турган жарандарды гана камтыйт. Ошондуктан жумушсуздуктун реалдуу деңгээли мындан айырмаланышы мүмкүн.
