Кыргызстанда туризм тармагындагы ишканалардын саны дээрлик 12 миңге көбөйдү

Кыргызстанда туризм тармагында иштеген катталган ишканалардын саны бир жылда дээрлик 12 миңге өстү. Улуттук статистика комитетинин маалыматына ылайык, 2026-жылдын башында алардын саны 153.3 миңди түзгөн. Бир жыл мурда бул көрсөткүч 141.5 миң болгон.

Ошентип, бир жыл ичинде туризм тармагындагы ишканалардын саны 11.8 миңге же 8.3%га көбөйгөн.

Эң чоң өсүш эс алуу жана туризм кызматтарын көрсөткөн уюмдарда байкалган. Алардын саны 18.4 миңден 26.1 миңге чейин көбөйүп, 42%га өскөн.

Ошол эле учурда туризм тармагынын экономикадагы ролу да жогорулаган. Туризмдин өлкөнүн ИДПсына кошкон салымы 8.2 млрд сомдон 10.9 млрд сомго жеткен. Анын ИДПдагы үлүшү 2.4%дан 2.6%га өскөн.

Мындан тышкары, туризм тармагына салынган инвестициялар көбөйгөн. Негизги капиталга багытталган каражат 3.2 млрд сомдон 4 млрд сомго чейин өскөн.

Туризмге байланыштуу тармактардын кирешеси да жогорулаган. Мейманканалардын жана башка жайгаштыруу жайларынын кирешеси 1.1 млрд сомдон 1.58 млрд сомго, ал эми туристтик агенттиктердин кирешеси 1.46 млрд сомдон 1.95 млрд сомго чейин көбөйгөн.

Ошондой эле туристтик кызматтардын экспорту бир жылда 230.6 млн доллардан 250.3 млн долларга жеткен.