Кыргызстанда жыл башынан бери керектөө баалары 5.5%га өстү

2026-жылдын январь-июнь айларында Кыргызстанда товарлардын жана кызмат көрсөтүүлөрдүн баасы былтыркыга салыштырмалуу орточо эсеп менен 5.5% кымбаттады. 

Улуттук статистика комитетинин маалыматына ылайык, жыл башынан бери:

•    азык-түлүк жана алкоголсуз суусундуктар 5.4%га;
•    алкоголдук ичимдиктер жана тамеки 7.2%га;
•    азык-түлүк эмес товарлар 3.3%га;
•    кызмат көрсөтүүлөрдүн баасы 8.3%га өстү.

Баалардын өсүшү өлкөнүн бардык аймактарында байкалган. Эң чоң кымбаттоо Ош облусунда катталып, ал жакта баалар 12.5%га жогорулаган.

Ош облусунда өзгөчө алкоголдук ичимдиктер менен тамекинин баасы 17.3%га, азык-түлүк эмес товарлар 9.8%га, ал эми кызмат көрсөтүүлөр 21.8%га кымбаттаган.

Ал эми азык-түлүк жана алкоголсуз суусундуктардын баасынын эң жогорку өсүшү Ысык-Көл облусунда катталып, 8.9%га жогорулаган.