Жарыяланган
2026-21-07, 14:29Кыргызстандын тышкы карызы ИДПнын 39%ына чейин төмөндөдү. Бул тууралуу президент Садыр Жапаров социалдык тармактагы баракчасына жазды.
Анын айтымында, 2020-жылга чейин өлкөнүн тышкы карызы ички дүң продукциянын (ИДП) 120%ын түзсө, бүгүнкү күндө бул көрсөткүч 39%га чейин азайды.
Президент өкмөт алдына мамлекеттик карызды ИДПнын 50%ынан ашырбоо милдетин койгонун билдирди.
“Ар бир алынган карыз мурдакыдай кумга сиңген суудай болуп кетпестен көрүнүктүү, 100 пайыз көзөмөлгө алынган, келечекте өз карызын өзү жапкан долбоорлорго жумшалып жатат” - деп белгиледи мамлекет башчы.
Ошондой эле ал айрым өлкөлөрдүн мамлекеттик карызы ИДПсынын 100%ынан ашканын белгилеп, Кыргызстан мындай тажрыйбаны үлгү кылбашы керектигин айтты.
