Жарыяланган
2025-23-05, 09:00Бишкекте Анкара 1/13 дарегинде салынып жаткан 12-14 кабаттуу турак жай комплексинин курулушу токтотулду. Аны "Дельмар Групп" компаниясы салып жаткан.
Архитектуралык-курулуш көзөмөлү башкармалыгы билдиргендей, текшерүү учурунда имарат өз билемдик менен курулуштун аяктаганы тууралуу расмий акт жок эле эксплуатация болуп жатканы аныкталган. Ошондой эле тротуарларды, бөлмөлөр ортосундагы дубалдарды тургузууда эреже бузулганы белгилүү болгон.
Андан тышкары курулуш болуп жаткан жерге чоочун адамдар киргизилген. Бул техника коопсуздугун одоно бузуу болуп саналат.
Текшерүүнүн жыйынтыгы менен протоколдор түзүлүп, эреже бузуулар жоюлганга чейин курулуш иштери токтотулган.
Аны менен бирге Курулуш министрлигине компаниянын лицензиясын кайтарып алуу маселесин кароо сунушталган.
