Жарыяланган
2026-13-11, 10:27Мындан ары электр унаалар менен кадимки май менен жүргөн унааларга тонировкага уруксаттын баасы бирдей болот. Бул тууралуу Унааларды каттоо боюнча мамлекеттик борбор билдирди.
Мындай чечим Конституциялык соттун 10-ноябрдагы чечимине ылайык кабыл алынган. Конституциялык сот электр ток менен жана май менен жүргөн унааларга тонировкага уруксат үчүн эки башка баа коюу Конституциянын 24-беренесинин 1 жана 2-пункттарына каршы келет деген чечим чыгарган.
Маселен унаанын алдыңкы каптал айнектерин караңгылатууга уруксат кагаздын баасы кадимки унаа ээлерине (жарандарга) - 50 миң сом, юридикалык жактарга — 70 миң сом жана резиденттер эмес үчүн — 90 миң сом деп каралган.
Ал эми электр унаа ээлерине (жарандарга) — 30 миң сом, юридикалык жактарга — 50 миң сом жана резидент эместер үчүн — 70 миң сом деп белгиленген. Эми электр унаалар үчүн да уруксаттын баасы 50 миң, 70 миң жана 90 миң сом болот.
Белгилей кетсек, азыр тонировкага уруксаттын баасы арзандатылып, акция өткөрүлүүдө. Ал 5-декабрга чейин уланат.
Акциянын алкаганда электр унааларга уруксат 20 миң сом деп каралган. Эми алар үчүн баа берки унаалардай эле 25 миң сом болот.
