Жарыяланган
2024-27-12, 11:352024-жылы Кыргызстандын авиация картасы жаңы багыттар менен толукталды. Бул туристтер үчүн да, жергиликтүү тургундар үчүн да саякаттарды ыңгайлуу жана жеткиликтүү кылуу үчүн жасалган маанилүү кадам. “Акчабар” ушул жылы ачылган аба каттамдардын тизмесин түздү.
Пекин - Бишкек - Пекин
25-январда Кытайдын China Southern Airlines авиакомпаниясы Airbus A320neo учактары менен ишке ашырган Пекин-Бишкек-Пекин аба каттамынын салтанаттуу ачылышы болду. Каттамдар жумасына үч жолу аткарылып, Кытай менен Кыргызстандын ортосундагы туризм, соода жана технология алмашууга өбөлгө түзөт.
Москва - Ош
Орусиянын “Победа” авиакомпаниясы Москва-Ош багыты боюнча каттамдарды ачты. Биринчи каттам 27-апрелде аткарылып, суу аркасы менен тосуп алынды. Каттамдар күн сайын, жумасына 7 жолу аткарылууда, биринчи каттам менен 180 жүргүнчү учуп келген.
Алматы - Ысык-Көл - Алматы
28-июндан тарта Алматыдан “Ысык-Көл” эл аралык аэропортуна “Qazaq Air” авиакомпаниясы уча баштады. Bombardier Q400 NextGen учактары менен учуулар жумасына эки жолу аткарылат: дүйшөмбү жана жума күндөрү. Алматыдан саякат убактысы болгону 35 мүнөттү түзөт, бул маршрутту өзгөчө туристтер үчүн ыңгайлуу кылат.
Ташкент - Ысык-Көл - Ташкент
16-июнда Өзбекстандын Silk Avia авиакомпаниясы Ташкент-Ысык-Көл-Ташкент багыты боюнча каттамдарды ачты. Каттамдар жумасына үч жолу: шейшемби, бейшемби жана жекшемби күндөрү аткарылат. Учуу убактысы эки саат. Келечекте аба каттамдардын санын көбөйтүү пландалууда.
Ош - Нью-Дели - Ош
25-сентябрда Ош-Нью-Дели-Ош багытында биринчи эл аралык чартердик авиакаттам ачылды. Кыргызстан менен Индиянын ортосундагы экономикалык жана дипломатиялык мамилелерди чыңдоо максатында аба каттамдары жумасына бир жолу шейшемби күндөрү учат.
Бишкек - Ош
27-сентябрь “Асман” авиакомпаниясынын командасы үчүн өзгөчө күн болду – авиакомпаниянын Бишкек-Ош каттамы боюнча алгачкы жүргүнчүлөр каттамы ишке ашты. Бул иш-чара авиакомпанияны ишке киргизүү боюнча көпкө созулган жана талыкпаган эмгектин натыйжасы болду.
Бишкек — Каракол
8-декабрда Каракол шаарындагы жаңы аэропортко биринчи техникалык каттам аткарылды. Ал эми 11-декабрда президент Садыр Жапаровдун катышуусунда көптөн күткөн аэропорттун ачылышы болду. Биринчи коммерциялык каттамдар 19-декабрда башталган.
