Жарыяланган
2026-12-05, 17:31Борбор Азия акырындык менен өзүнүн туристтик образын өзгөртүп жатат. Эгерде бир нече жыл мурун аймак көбүнчө бюджеттик маршруттар - треккинг, тоолор жана хостелдер менен байланышса, азыр аймактагы өлкөлөр кеңири туристтик сегментке, анын ичинде кирешеси жогору саякатчыларга багытталган инфраструктураны активдүү өнүктүрүүдө.
Маалымат Commonwealth Partnership компаниясынын IQ Knowledge Base командасынын изилдөөсүнөн алынган. Долбоордун жетекчиси Алексей Летуновский, аналитиктер - Катя Стайлс жана Анастасия Рогова.
5-7 жыл мурун аймактагы туристтик инфраструктура негизинен чектелүү болчу. Борбор шаарлардан тышкары жерлерде жергиликтүү мейманканалар, чакан үй-бүлөлүк отелдер жана конок үйлөр көп болгону менен алардын кызматы эл аралык стандарттарга толук жооп бере берчү эмес.
Бүгүнкү күндө Борбор Азия “арзан багыт” деген образдан бара-бара алыстап жатат. Анын ордуна бул жерде эл аралык мейманкана тармактары, кымбат отелдер, премиум кызмат көрсөтүү жана сапат үчүн төлөөгө даяр туристтер менен толук кандуу комфорттуу эс алуу рыногу калыптанууда.
2025-жылга карата Борбор Азиядагы брендделген номерлердин саны 12 миң 743кө жетти. Бул көрсөткүч 2020-жылга салыштырмалуу дээрлик 90%га өскөнүн билдирет.
Номердик фонддун бөлүштүрүлүшү төмөнкүчө көрүнөт:
Мейманкана индустриясы үчүн бул абдан жогорку өсүү темпи болуп эсептелет. Мында жаңы мейманканалардын саны гана эмес, рынокко кимдер кирип жатканы да маанилүү.
Акыркы жылдары Борбор Азия дүйнөдөгү ири мейманкана тармактары активдүү кеңейген аймакка айланды. Алардын катарына төмөнкүлөр кирет:
Эл аралык мейманкана тармактары сапаттуу сервиске, кымбат номерлерге жана ыңгайлуу инфраструктурага туруктуу суроо-талап пайда болгон жерлерге келишет. Бул аймак эми жогорку төлөм жөндөмдүүлүгү бар туристтерди көбүрөөк тарта баштады, анткени көрсөтүлүп жаткан кызматтын деңгээли башка туристтик багыттар менен атаандаша алат.
Эл аралык тармактар борбор шаарлар менен эле чектелбестен, туристтик аймактарга да активдүү чыгууда:
Бул аймак бара-бара саякатты комфорт менен айкалыштырууну каалаган аудиторияга багыт алып жатканын билдирет. Башкача айтканда, адам Кыргызстандагы тоолорго же Самарканд шаарына келип, ошол эле учурда Hyatt, Hilton же Sheraton сыяктуу мейманканаларда жайгаша алат.
Аймактагы эң өнүккөн мейманкана рыногу болуп Казакстан саналат. Борбор Азиядагы брендделген номердик фонддун болжол менен 57%ы ушул өлкөгө туура келет - бул 7,2 миңдей номерди түзөт. Казакстан көбүнчө классикалык туристтик эс алуудан көрө ишкердик жана премиум сегментти өнүктүрүүгө басым жасайт. Бул багыттын негизги борборлору - Астана жана Алматы.
Бул шаарларда эл аралык форумдар, саммиттер, ишкердик иш-чаралар жана ири бизнес-жолугушуулар өтөт. Сезондук туризмден айырмаланып, бизнес-туризм мейманканаларга жыл бою туруктуу жүктөм берет. Дал ушул себептен улам эл аралык мейманкана тармактары Казакстанда өз ишмердүүлүгүн активдүү кеңейтип жатышат.
Чынында, Казакстан өзүнө өзүнчө нишаны тандап алып, бизнес, эл аралык иш-чаралар жана төлөм жөндөмдүүлүгү жогору туристтер үчүн ыңгайлуу инфраструктура түзө алды.
Бул мейманканалардын бааларынан да ачык көрүнөт (бир адамга):
Эгер Казакстан рыноктун көлөмү боюнча лидер болсо, Өзбекстан бүгүн Борбор Азиядагы эң ылдам өсүп жаткан мейманкана рыногу болуп эсептелет.
2020-жылдан бери өлкөдөгү номердик фонд 272%га өсүп, 4 миң 473 номерге жетти. Бул өсүш көбүнчө Өзбекстан маданий туризмди толук кандуу эл аралык продуктка айландыра алгандыгы менен байланыштуу. Мурда Самарканд жана Бухара кыска мөөнөттүү экскурсиялык сапарлар үчүн, салыштырмалуу арзан жайгашуу менен гана кабыл алынчу.
Азыр болсо кырдаал өзгөрүүдө. Тарыхый объекттердин жанында эл аралык мейманкана бренддери жана кымбат комплекстер пайда болууда. Мунун натыйжасында ар бир турист узагыраак калып, тарыхый экскурсиялар менен гана чектелбестен, шаарды аралап, чыгыш жомогундай атмосферага сүңгүп кирүүгө мүмкүнчүлүк алууда.
Бул Борбор Азия үчүн премиум эл аралык туризм деңгээли болуп эсептелет. Ошол эле учурда Ташкент аймактагы эң атаандаштык жогору рыноктордун бири бойдон калууда. Мейманкана сунуштарынын тез өсүшүнөн улам бул жерде баалар көп учурда азыраак өнүккөн рынокторго караганда төмөнүрөөк болуп жатат.
Бир адамга баалар:
Демек, Өзбекстан азыр бир эле учурда массалык туризмди да, жогорку баалуу премиум сегментти да активдүү өнүктүрүп жатат.
Кыргызстан азырынча чакан мейманкана рыногу бойдон калууда - болжол менен 585 брендделген номер бар. Бирок бул жерде да өзгөрүүлөр байкалып жатат. Узак убакыт бою өлкө негизинен бюджеттик экотуризм, Ысык-Көл жээгиндеги сезондук эс алуу, жөө жүрүштөр жана тоо туризми, ошондой эле арзан конок үйлөрү менен байланышып келген. Чет элдик туристтер негизинен жаратылышты көрүү жана төмөн баалар үчүн келишчү.
Бирок азыр рынок акырындап ыңгайлуу жана сапаттуу эс алууга багыт ала баштады.
Бул бир нече өзгөрүүлөрдөн көрүнөт: аймакка эл аралык мейманкана тармактары кирип жатат, курорттук инфраструктура өнүгүүдө, премиум деңгээлдеги мейманканалар пайда болууда. Ошол эле учурда Кыргызстанга келген чет элдик туристтердин кызыгуусу да өсүп, жаратылыш жана арзан баалар менен гана чектелбестен, жогорку деңгээлдеги комфорттуу эс алууга да артыкчылык бере башташты.
Бүгүн Бишкекте Sheraton Bishkek, Hyatt Regency Bishkek жана Novotel Bishkek иштеп жатат - бул рынок акырындап көбүрөөк кирешелүү туристтерге жана бизнес сегментке багытталып жатканын көрсөтөт.
Баалар да акырындык менен эл аралык деңгээлге жакындап барат (бир адамга):
Тажикстан региондогу эң чакан мейманкана рыногу бойдон калууда - болжол менен 485 брендделген номер бар. Бирок дал ушул жерде сапаттуу инфраструктуранын жетишсиздиги бааларга кандай таасир эткени айкын көрүнөт.
Мисалы, бир адамга баалар:
Бул жердеги жогорку баалар ири туристтик агымдан эмес, тескерисинче сунуштун чектелүү болушунан улам деп түшүндүрүлөт. Эл аралык сапаттагы мейманканалар аз болгондуктан, алар бааны жогору деңгээлде кармап тура алышат. Демек, Тажикстан рыногу азырынча нишалык жана атаандаштык деңгээли төмөн бойдон калууда.
Борбор Азияда премиум мейманканалар сегменти өсүп, ишкердик туризм өнүгүп, кызмат көрсөтүүнүн деңгээли жогорулап жатат. Барган сайын туристтер комфортко жана гастрономиялык тажрыйбага көбүрөөк көңүл бура башташты.
Регион азыр Европадан, Кытайдан, Түркиядан жана АКШдан келген бизнес-туристтерди жана төлөм жөндөмдүүлүгү жогору конокторду тартып жатат. Алар үчүн эң маанилүүсү - сапат жана сервис.
Муну менен Борбор Азия акырындап “бюджеттик багыт” деген образдан алыстап, эл аралык туристтик рыноктун толук кандуу оюнчусу катары позициясын бекемдөөдө.
